CELOTEH ANAK BETAWI

AADB (ADA APA DENGAN BABEH?)

                                                                                  By: Mimi Aira

      Babeh gue nyegir kuda waktu Enyak gue nyap-nyap abis-abisan di ruang makan. Gue, yang saat itu baru aja pulang sekolah, udah bisa ngebaca situasi yang ada di depan gue. Pasti ada sesuatu yang salah yang telah dilakukan Babeh ke Enyak. Kalo nggak, mana mungkin Enyak pasang muka angker begitu.

     “Salam lekuuum…” Gue mengucap salam dengan nada panjang.

     “Kum salam!” Enyak noleh sebentar ke arah gue sambil nyaut ketus . Babeh juga ikutan nyaut, tapi pelan aja suaranya.

     “Pokoknye, Ipeh kagak mao kejadian kayak gitu terulang lagi!” semprot Enyak sewot. “Lagian, Abang nape kagak mao nengok ke belakang dulu, sih? Coba kalo nengok ke belakang dulu, Ipeh kagak bakalan ketinggalan, Bang!” Enyak kelihatan ngotot banget kayaknya.

     Gue liat Babeh nggak berucap apa-apa, dia duduk santai sambil ngunyah bubur kacang panjang ijo. Sekilas Babeh ngelirik gue yang hendak mencium tangannya. Lalu, gue cium juga tangan Enyak. Sebenernya, gue kagak berani mendekat kalo Enyak lagi sensi begitu. Rupanya, Enyak bener-bener marah sama Babeh hari ini.

     Kalo inti persoalannya sih gue udah yakin, pasti soal keteledoran Babeh yang lupa naek-in Enyak di boncengan motornya lagi.

     Karna perut gue udah lapar berat, setelah cuci tangan,  maka gue putuskan untuk segera makan siang.

     “Neh ayamnya mana, Nyak? Kembang duren melulu…” tanya gue sambil nyendok nasi. Gue juga berharap, dengan gue mengalihkan perhatian mereka, maka keduanya nggak lagi ribut.

     “Tangkep noh di kebon! ” ketus enyak lagi.

     “Nyak, Piyan mao-nya tuh ayam udah tinggal makan. Kagak pake acara ngejar-ngejar ayam dulu. Dimasak dulu. Digoreng dulu… Lah, terus kapan Piyan makannye? Keburu perut Piyan kenyang ‘kali, Nyak,” tutur gue panjang lebar.

      BRAK!

     Meja digebrak Enyak tanpa permisi dulu. Gue dan Babeh jelas kaget dibuatnya. Bahkan, sempet gue lihat Babeh kejet-kejet saking kagetnya.

     “Heh, Yan, nyang bilang tuh ayam suruh dimasak dulu siape?!” semprot Enyak emosi.

     “Laaaah, tadi ‘pan Enyak sendiri nyang bilang kalo Piyan disuruh nangkep ayam dulu. Bijimane sih, Nyak?” tanggap gue nyablak. Sementara Babeh masih sibuk ngelus-ngelus dadanya yang hampir meledak saking kagetnya.

     “Eh, maksud Enyak, tuh ayam langsung aja lu gigit-gigit kalo emang laper,” kata Enyak tanpa perasaan.

     “Heyaaah, Enyak…jadi Piyan disuruh makan ayam idup-idup, gitu? Ogah! Lagian, emang Piyan musang!”

     “Abaaaang, dengerin kagak sih kalo bini lagi ngomong?!” Enyak mulai nyap-nyap lagi. Dan kembali Babeh yang jadi sasarannya.

     “Iye. Gue denger, Ipeh. Tapi ya, Peh,  kalo ngomong jangan pake teriak-teriak begitu, DWOOOONG! Lobang kuping gue mo soak, neh!” Babeh nggak kalah ngotot. Mukanya dia tempelin ke muka Enyak. 
     Sikap Babeh itu membuat Enyak gue bengong di tempat. Tanpa suara, tanpa kata-kata. Mendapat tanggapan seperti itu dari Babeh, kayaknya nih, Enyak nggak bakal nyap-nyap lagi, deh. Mulut doi udah mingkem sekarang.

     Sukur, sukur…! seru gue dalam hati.

     “Eh, Bang, Ipeh tuh, ye…kalo ngomong kagak pernah nyang namanya teriak-teriak!” sambut Enyak lantang.

     “Tapi ye, Bang, kalo Ipeh digini-in terus, Ipeh jadi sebel ame Abang! Tiap  Ipeh naek motor, terus Ipeh turun, nape Abang lupa ngeboncengin Ipeh lagi? Ape Abang emang kagak cinte lagi ame Ipeh, iye Bang? Ayo ngaku! NGAKOOOOO…!” Enyak lantas melolong panjang sambil kecak pinggang.

     Gue yang saat itu lagi asyik ngemut nasi, mendadak geli setengah mati ngeliat reaksi Babeh. Doi dengan gemesnya ngegigit pinggiran meja makan.

     “Ipeh…” panggil Babeh sambil menatap tajam istrinya. “Rrrrr…” Entah kenapa mulut Babeh tiba-tiba menggumam  nggak jelas sambil menggoyangkan kepalanya ke sana-kemari...

     Hiiyyy, kenapa Babeh jadi nyeremin gitu, ya? Hihihi… Sabar, Beh, sabar… 

     “Nyak, Pian lagi pengen makan sambel terasi, neh. Tulung bikinin ye, Nyak.” Gue coba lagi menetralisir suasana. Eh, tapi Alhamdulillah, ya…Enyak gue langsung ngambil cabe, tomat, terasi, dan nyamber ulekan, tuh.

     BRAK!

     Dalam sekejap, tuh ulekan udah ngejogrok di depan gue. Dibanting Enyak dengan sekenceng-kencengnya.

     “Astapirloh, Enyak! Jantung Pian sampe melorot, neh!” protes gue kaget.

     “Bodo mamat, ah!”  Enyak gue cuek bebek.

     “Neh, elu bikin ndiri sambel terasinye. Enyak mao introgasi Babeh lu. Kebiasaan banget emang tuh Babeh lu. Di manaaa aja…ato, ke manaaa aja…Enyak lupa diboncengin lagi. Padahal neh, Yan, nyang Enyak naek-in itu baru belanjaan doang. Enyak belon naek, eh Babeh lu udah maen ngacir aje. Empet banget kan Enyak jadinye…” kata Enyak pada gue.

     Saat gue lirik Babeh, dia cuman diem sambil ngegigit mangkok kosong. Hihihi…

     “Bang, jangan diem aje, dong! NGOMONG!” sentak enyak kenceng.

     “Ipeh nyang botoh. Nyang cakep. Nyang semok…‘pan Abang udah minta maap. Waktu entu, Abang pikir lu udeh naek, eh kagak tau-nya belanjaan elu doang nyang naek. Elu juga sih, kenapa diem aja waktu entu?” kelit Babeh gue. “Jadi, bukan salah Abang juga, dong,” katanya lagi.

     Enyak melotot lebar ke arah Babeh.

     “Makanya, Bang, nengok ke belakang dulu. Biar Abang tao kalo Ipeh tuh udah naek apa belom. Ini nggak, maen tarik gas aje! Abis deh Ipeh jadi bahan ketawaan orang-orang di warung Ucok.”

     “Pantesan, Peh, kok rasanya motor gue enteng banget. Biasanye, kalo elu udah naek ‘pan langsung “jleb” gitu, ya. Berasa kayak ada gajah menclok di belakang gue. Hihihi…” Babeh ngikik di kolong meja.

     Gue yang lagi ngulek sambel sempet geli juga ngedengernya. Tapi, sebisa mungkin gue umpetin senyum gue itu. Gue takut Enyak jadi tersinggung dan kemudian malah gue yang diulek doi. Hihihi…

     “Nyak…” Gue mulai bersuara lagi.

     “Minta ape lagi, hah?!” semprot Enyak gue napsu.

     Hadeuuuh…baru juga ngomong sepotong, eh si Enyak maen sentak aja.

    “Eni, Nyak…mata Pian kepedesan. Tulung ambil tisu dong, Nyak.” Gue merintih-rintih. Perih banget rasanya. Padahal neh, tuh biji cabe mentalnya di gigi gue. Tapi, kenapa, malah mata gue yang pedes, ya? Aneh nggak, sih?

     “Pake serbet dapur Enyak aje nih, Yan.” Enyak nyodorin serbet ke gue.

     Dengan cepat gue samber serbet itu. Lalu, gue tekan lembut mata gue dengan serbet.

     “Masih berasa pedes kagak, Yan?” tanya Enyak was-was.

     “Udeh mendingan sih, Nyak.”

     “Lah, Peh, bukannya tuh serbet bekas ngelap anuan bebek tadi?” celetuk Babeh kemudian.

     Enyak mendadak mundur selangkah. Lalu, doi berdiri di pojok ruangan sambil menutup mulutnya. Kayaknya sih Enyak lagi mentertawakan sesuatu.

     “Hah? Anu-an apaan? Maksud Babeh apa sih, Beh? Beh, kalo ngomong nyang jelas nape!” Gue tatap heran wajah Babeh.

     “Itu-an bebek! Masa kagak ngerti juga sih lu, Yan? Ampas belakangnya bebek, Piyaaaan! Lola banget sih lo!” hardik Babeh gemes.

     “Jadi? Ohmehot! Nyang bener, Nyak?!” tanya gue kaget.

     “Ja-Jadi…it-itu?” Gantian gue pandang Enyak gue. Doi masih tampak sibuk menahan rasa gelinya.

     “Enyaaaaaaaaak!” Gue menjerit sejadi-jadinya sambil ngebanting serbet. Gue kelojotan di kolong meja makan. Gue meraung kenceng. Dan gue…gue capek sendiri akhirnya.

     “Enyak tega…” lirih gue pilu.

     “Maap deh, Yan… Enyak lupa kalo entu serbet kotor.” Enteng aja jawaban Enyak.

     Gantian Babeh yang ngikik sekarang.Hihihi...

     Emang pada tega semuanya!

     “Lah, Yan, mao ke mane lu?!” teriak Enyak.

     “Mandeee!” Gue langsung ngibrit ke kamar mandi.

     “Lah, tuh bocah, ya…mandi siang-siang begini,” gumam Enyak.

     “Abaaang…! Mau ke mana, Bang?! Ini bijimane, sih? Urusan kita ‘pan belon kelar!” Enyak ngoceh sendirian sampe doi megap-megap. 

     “Aduh, Peeeh…gue janji dah kagak bakalan ninggalin lu lagi. Tapi eni, nih…perut gue mules banget. Kebanyakan makan bubur kacang ijo ‘kali, neh. Udeh ye, gue mao nyetor dulu. Daag, Ipeh…!” Abis melambai genit, Babeh pun langsung melompat gesit ke ruang “unit gawat darurat”.

     Ya. Emang seperti itulah suasana gaduh di rumah gue setiap harinya. Apalagi, kalo anak Enyak-Babeh gue yang ada tujuh orang itu ngumpul semua di rumah. Suara ratusan bebek aja masih kalah rame dengan suasana di rumah gue. Lu bisa bayangin sendiri, kan kayak apa ributnya? Mau lagi ribut kek, enggak kek, tetep aja ngomongnya pada kenceng. Enggak peduli kalo lawan bicaranya lagi ngejogrok di depan muka sendiri.

     Sekali lagi, seperti itulah kehidupan keluarga gue sehari-hari.

     Nape? Gue masih betah aja tinggal di rumah kayak gini? Sebenernya sih gue pengen banget protes sama kelakuan Enyak-Babeh gue. Dan pernah juga suatu ketika gue protes. Tapi apa tanggapan Enyak-Babeh gue, coba? Kepala bulet gue abis diunyeng-unyeng!

     What? Ape lo bilang, ini derita gue? Suwe banget lu pada! *ngasah pedang*

     Namun, biar bagaimanapun juga gue tetep sayang sama Enyak dan Babeh gue. Abang-abang gue. Mpok-mpok gue. Adik gue. Ikan julung-julung gue. Ayam-ayam gue. Bebek. Kebo. Sapi. Kambing. Semuanya. Semuanya…

                                                               ***

     Pagi itu, di dapur Enyak yang rada-rada keren tapi rada-rada amburadul juga, gue lihat Enyak lagi duduk sedih di atas kulkas.

     “Yaoloooh, Enyak! Nape naek-naek di situ, sih? Kalo sampe kulkasnya rusak kan sayang, Nyak. Toron!” Gue deketin Enyak sambil mencoba membantunya turun.

     “Kagak! Enyak mao duduk terus di mari,” tolak Enyak tegas.

     “Nah loh! Tapi sampe kapan, Nyak?”

     “Sampe Babeh lu janji ame Enyak, kalo dia kagak ninggalin Enyak diboncengan motornye lagi,” katanya lirih.

     “Ya udeh. Entar Piyan bantu ngomong ke Babeh, deh. Nyang penting sekarang Enyak turun dulu. Lagian ‘pan  Enyak pernah bilang, kalo setiap permasalahan itu ada jalan keluarnya. Ayo, Nyak, turun …” Gue bujuk lagi Enyak.

     Akhirnya Enyak mau turun juga dari atas kulkas.

     “Nyak, emang Babeh dulunya kayak gitu, ye? Suka lupa-an ato emang Babeh udeh pikun, sih?” Gue ajak Enyak gue bicara. Siapa tahu setelah berbagi rasa dengan gue, hatinya nggak sedih lagi.

     “Sebenernya sih Babeh lu emang kayak gitu sejak kite jadian dulu. Orangnye gampang lupa. Tapi, belakangan ini Babeh lu makin sering lupanye, Yan. Enyak sih sebenernya bisa memaklumi. Tapi gimana ya…Enyak suka sedih juga, ‘pan,” suara Enyak gue masih lirih. Bahkan, gue lihat matanya mulai berkaca-kaca.

     Duh, nggak tega gue ngeliatnya…

     “Nyak, Piyan rasa, Enyak kurang memahami aje deh sifat pelupa Babeh. Neh maap maap ye, Nyak. Kalo Piyan liat, Enyak mungkin terlalu berlebihan menyikapi ulah Babeh itu.”

     BRAK!

     Gue melongo ngeliat meja makan yang pecah berkeping-keping digebrak Enyak barusan. Duile, Nyak…biasa aja nape!

     “Maksod lo?” Enyak gue berang. Raut mukanya gue kenal betul, ngajak berantem!

     “Maksud Piyan gini, Nyak. Contohnya Piyan, neh… Piyan bisa nerima kelebihan dan kekurangan pacar Piyan. Walow-pun pacar Piyan super galak, tapi dia nyeremin,” ujar gue yakin.

     Tuing! Pala gue dijeguk Enyak gue.

      “Di mane kelebihannye? Udah galak, nyeremin ‘lagi…” protes Enyak.

     Gue nyengir bajing.

     “Hehehe…maksud Piyan, biar pacar Piyan galak, tapi dia perhatian banget ame Piyan, Nyak. Jadi, kenapa Piyan bisa jalan ame die selama dua taon, coba?”

     “Mana Enyak tau! Malah nanya ‘lagi lu…” Enyak tampak kesel banget.

     “Ya, karna Piyan nggak cuma nerima kelebihannye aje, tapi juga kekurangan die. Gicyu, Nyak…”

     “Jadi, ceritanya elu mao ngajarin Enyak, neh…”     

     “Ya, kagak begitu maksud Piyan, Nyak. Itu sih terserah gimana tanggapan Enyak aje. Piyan cuma pengen Enyak ame Babeh hidup rukun, Nyak.”

     Hehehe… Asal lo semua pada tau, sebenernya gue ini belum pernah punya pacar. Duh, gue jadi nggak enak nih udah ngebohongin Enyak gue.

     Nyak, maapin Piyan, ya Nyak…

     “Iye. Enyak tau elu kagak maksud kurang ajar ame Enyak, Yan. Emang sih, ade benernye juga omongan lu. Seharusnya Enyak kagak cuma bisa nerima kelebihan Babeh aje, tapi juga kekurangannye. Makasih ya, Yan. Elu udeh membuka mata hati Enyak. Enyak sayang banget ama elu, Yan.”

     “Piyan juga, Nyak.” Gue peluk Enyak erat.

     “Nyak, besok-besok kalo Enyak turun dari motor, pada saat Enyak mao naek, suruh nengok ke belakang dulu Babeh-nye. Biar Enyak kagak ditinggal lagi,” ujar gue.

     “Iye, Yan.”

     “Ato gini aja, Nyak…tiap Enyak turun, iket aja batu gede di ban motor Babeh. Jadi kan lari motornya kagak jauh-jauh, Nyak. Terus, Enyak kejar deh tuh  motor Babeh,” usul gue.

     “Pinter lu, Yan!” Enyak manggut-manggut girang.

     “Huhuhu…Hwuaaaa…Enyaaaaaaak…!”

     Di depan rumah, tiba-tiba mpok gue yang baru pulang sekolah meraung-raung kenceng.

     Gue dan Enyak langsung ngibrit ke luar.

     “Elu kenape sih, Mar, pulang-pulang mewek begitu? Abis disetrap guru lu, ye?” tanya Enyak buru-buru.

     “Bukan disetrap, Nyak. Tapi Mariam nyesel udah ngabisin duit jajan sekolah. Huhuhu…” Mpok gue masih nangis.

     “Lah, ‘pan emang tuh duit buat jajan elu, Mar. Ngapain pake nangis?”

     “Nyak, bukan entu masalahnye!” Mpok gue kelojotan sendiri. 

     “Mariam nangis karna ditinggalin Babeh di POM bensin! Hwuaaaaa…”

      Hihihi…gue ngikik sampe jungkir balik. Enyak gue juga ikut ketawa tanpa suara, tapi kedua bahunya berguncang keras.

     Ternyata, mpok gue pun telah jadi korban keteledoran Babeh. Hihihi… Babeh...Babeh!